BC3k Emakume eta Neska Zientzilariaren Nazioarteko Egunean parte hartzen du, bi web mintegi berezirekin

Emakume eta Neska Zientzilariaren Nazioarteko Eguna ospatzeko, BC3k bi web mintegi antolatuko ditu 2024ko otsailaren 13an. Lehenengo saioa ingelesez izango da goizeko 10etatik 11ak arte, eta ondoren euskarazko saioa goizeko 11etatik 11.30 arte, “Emakumeak eta neskak klima aldaketaren zientzian” ekimenari jarraipena emanez, Emakumeak Zientzian proiektuaren baitan.

Web mintegi hauen helburua STEAM karrerek eskaintzen dituzten aukera ugariak erakustea da, arreta berezia jarriz bigarren hezkuntzako ikasleetan, batez ere emakumeetan, eremu hauek aztertzera animatzeko. Industrian dagoen genero-arrakala iraunkorra dela eta, bi saioetan BC3ko emakume ikertzaileak hartuko dute parte, eta beraien ibilbide pertsonalak eta profesionalak partekatuko dituzte, aurre egin dieten erronkei helduko diete eta zientziaren eta teknologiaren eremuetan genero-ikuspegia txertatzearen garrantzia azpimarratuko dute.