María José Sanz BC3ko zuzendari zientifikoak Aholkularitza Zientifikoko Bulego Nazionalaren (ONAC) aurkezpen ofizialean parte hartu zuen atzo. Espainiako Gobernuko presidente Pedro Sanchez eta Zientzia, Berrikuntza eta Unibertsitate ministro Diana Morant izan ziren Ikerketa Zientifikoen Kontseilu Gorenaren (CSIC) egoitza nagusian, Madrilen.

ONAC Espainiako Gobernuaren erabakiak hartzerakoan ezagutza zientifikoak duen papera indartzeko mekanismo instituzionalak ezartzeko helburuarekin sortu da, eta 50 eta 80 zientzialari bitarteko lantaldea izango du, aurtengo urritik aurrera hainbat ministeriotan sartuko dena. Hiru osagai nagusiren inguruan egituratua (pertsonak, ikerketa aplikatua eta mekanismo instituzionalak).

María José Sanzek, bere hitzaldian, zientzia politika publikoen formulazioan integratzearen garrantzia eta bulego berri honen sorrerak dakarren aurrerapen handia azpimarratu zituen.

“Zientzia palanka gisa ikusi behar dugu, ebidentzietan, informazio gardenean eta ezagutza eskuragarrian oinarritutako adostasun-elkarrizketak ezartzeko, gero eta diziplina anitzagoa izan behar baitu gizarte-zientziak txertatuz”. (María José Sanz, zuzendari zientifikoa, BC3)

Hitzaldian, BC3ko zuzendariak zientzialarien eta beste eragile batzuen arteko lankidetza ireki eta zintzoaren beharra ere azpimarratu zuen, komunitate zientifikoak gizartean duen eginkizunaren jakitun izan behar duela esanez.

“Funtsezkoa da zientzia-adituen eta ezagutza zientifikoen osagarri diren ezagutzak dituzten beste eragileen lankidetza zintzoa eta irekia izatea”. (María José Sanz, zuzendari zientifikoa, BC3)

ONACen sorrerarekin, Espainiako Gobernuak agintzen du ezagutza zientifikoak Estatuko Administrazio Orokorraren erabakiak hartzean duen eginkizuna indartuko duela, eta mekanismo instituzionalak bultzatuko dituela, arduradun publikoek ezagutza zientifikoaren bidez erabaki informatuak har ditzaten sustatzeko, etorkizuneko erronkei modu eraginkorragoan aurre egiteko.

“Ezagutzaren eta ekintzaren arteko zubia funtsezkoa da. Ezagutzaren integrazioa behar dugu, non ezagutza hori erabiliko den testuinguru soziala, kulturala eta ekonomikoa ondo ulertu behar diren, errespetua eta elkar ulertzea tartean “. (María José Sanz, zuzendari zientifikoa, BC3)